ТОЛИБЗОДА ФИРДАВС НАЗРИМАД

 Раиси Бонки миллии Тоҷикистон

Толибзода Фирдавс Назримад 11 марти соли 1980 таваллуд шудааст. Ӯ дорои маълумоти олӣ буда, Донишгоҳи Шарқи Миёназамини Ҷумҳурии Туркии Кипри Шимолиро бо ихтисоси бонкдорӣ ва молия хатм намудааст.

Фаъолияти меҳнатии Толибзода Фирдавс Назримад соли 2003 дар Бонки миллии Тоҷикистон оғоз ёфтааст.  Номбурда нахуст дар Идораи назорати бонкӣ ва иҷозатномадиҳии БМТ ба ҳайси иқтисодчии дараҷаи II ва иқтисодчии пешбар ифои вазифа намудааст.

Толибзода Ф.Н. солҳои 2009-2010 дар Магистратураи Институти миллии олӣ оид ба фанҳои сиёсии Токио таҳсил карда, баъди анҷоми он то соли 2015 дар вазифаҳои сариқтисодчӣ, сармутахассис, муовини сардори шуъбаи назорати ташкилотҳои молиявии ғайрибонкӣ ва шуъбаи бозрасии дувуми Департаменти назорати бонкии Бонки миллии Тоҷикистон фаъолият кардааст. Сипас ба ҳайси  муовини сардор, сардори Идораи таҳлил ва иҷозатномадиҳии Департаменти назорати бонкӣ ва солҳои 2020-2021 дар вазифаи муовини директори Департаменти назорати бонкии БМТ фаъолият анҷом додааст.

18 январи соли 2021 Толибзода Фирдавс Назримад бо Фармони Президенти Ҷумҳурии Тоҷикистон Муовини Раиси Бонки миллии Тоҷикистон ва 17 августи соли 2022 бо Фармони Президенти Ҷумҳурии Тоҷикистон ба вазифаи Муовини якуми Раиси Бонки миллии Тоҷикистон таъин гардид.

Тибқи Фармони Президенти Ҷумҳурии Тоҷикистон аз 16 январи соли 2024, №681 Толибзода Фирдавс Назримад Раиси Бонки миллии Тоҷикистон таъин гардид.

Аълочии Бонки миллии Тоҷикистон, узви Ҳизби Халқии Демократии Тоҷикистон буда, забонҳои  англисӣ, русӣ ва туркиро медонад.